இயந்திரப் பறவை

வரமா சாபமா என தெரியாமலேயே
நிரப்பப்பட்டுவிடுகின்றன
ஒவ்வொரு நாளினதும் விடியல்கள்

திருப்பங்கள் ஏதுமல்லாத தண்டவாளங்களில்
எதிர்பார்ப்புகள் ஏதுமற்ற பயணங்களில்
தொலைந்துபோய்விடுகின்றன
நினைவுகளில் தங்கிவிடாத நாட்களின்
எண்ணிக்கைகள்

ஏதாவது அதிசயம் நிகழ்ந்து
நாட்குறிப்பில் குறித்து வைக்கக்கூடிய
ஒரு நாளின் விடியல் பொழுதுக்காய்
எனது நாட்குறிப்பும் நிரப்பப்படாத பக்கங்களுடன்
காத்திருக்கிறது

ஸ் ரீபன்

புரிதல்

இதுவரை எழுதப்பட்டிருக்காத
கவிதையின் தலைப்பில்
தொடங்கப்பட்டிருந்தது
உனக்கும் எனக்குமான
முதல் புரிதல்

விழுந்து நொருங்கி சிதறிப்போன
ஒரு கண்ணாடித்துண்டு
என்மீதும் தெறித்து விழுந்தது
தற்செயலாக இருக்கலாம்
என்ற நம்பிக்கையில்
உன்னைப் பார்க்கையில்
உன் கண்களில்
சூரியன் அஸ்தமிக்கத் தொடங்கியிருந்தான்

பிறிதொரு நாளில்
உன் வார்த்தைகளின் உஸ்ணம் தாளாது
மழைமேகம் கரைந்து நிலத்தில் மோதியபோது
உன் அறைக்கதவு என் முகத்தின் முன்
அறைந்து மோதி மூடிக்கொண்டது

உனக்கும் எனக்குமான பேச்சுக்கள்
தோல்வியில் முடிவடைந்தபின்
ஏதோ ஒருவித புரிந்துணர்வில்
விலகி நடக்கையில்
இன்னமும் எங்கோ ஒரு மூலையில்
என்னுள் நீ வாசம் செய்கிறாய் என்பதை
மறுதலிக்க முடியாமல் தோற்றுப்பேகிறேன்

இதுவும் ஒருவித ஆண்களின் புரிதலாக இருக்கலாம்

ஸ் ரீபன்

மறுபடியும் ஒரு ஜனனம்

மரணம் நோக்கிய
எனது தேடல்களின் போதெல்லாம்
புதிதாய் ஓரு ஜனனம் தேவைப்படுகிறது

கடந்துவிட்ட இறந்தகாலத்தின் கதவை
மறுபடியும் திறந்து
வாழமுடியாது விட்டுப்போன வாழ்க்கையை
மறுபடியும் வாழ்ந்துபார்க்க
கிடைக்கலாம் மீண்டும் ஒரு ஜனனம்

நிறைவேறாத ஆசைகளுடன் இறந்து
ஆவியாய் அலைவதிலெல்லாம்
இஸ்டமில்லை எனக்கு

நீண்ட தேடல்களில்
விடுபட்டுப்போனவற்றையெல்லாம்
ஒரு பட்டியலிட்டு
கதை
திரைக்கதை
வசனம்
இயக்கம்
எல்லாம் போட்டபின்
நெருங்கலாம் என்னை மரணம்

மரணம் நோக்கிய
எனது தேடல்களின்போதெல்லாம்
புதிதாய் ஒரு ஜனனம் தேவைப்படுகிறது

ஸ் ரீபன்

ஸ்பரிசம்

சிட்டுக்குருவியின் மீதான தொடுதல்
சாத்தியமாகவில்லை இன்றுவரை

அதன் ஒற்றைக்கண்ணுக்குள்
நீண்டு விரிந்து செல்லும் பயம்
எழுதிப்போயிருக்கிறது
கொஞ்சம் விலகியே இரு என்னும்
வார்த்தை

ஆனாலும் இப்போது
கொஞ்சம் நட்பாய்
கொஞ்சம் புரிந்துணர்வாய்
கொஞ்சம் அண்மையாய் வந்து
உணவை கொத்திப்போகிறது

எப்போதோ சில பூனைகள்
அதன் மென்மை விலக்கி
பிராண்டி எறிந்திருக்கலாம்
ஒவ்வொரு இறகுகளும் அதன் வலியை
காற்றில் பதிவுசெய்திருக்கலாம்
எந்த நட்பும் வேண்டாம் என்ற
மறுதலித்தலை அதன் பார்வை
உறுதி செய்கிறது

சிட்டுக்குருவியின்மீதான தொடுதல்
இப்போதைக்கு சாத்தியமில்லையென்றே
தோன்றுகிறது

ஸ் ரீபன்

ஹைக்கூ கவிதை கூட்டணி

ஒரு சிறிய விளக்கு போதுமே
யாருமற்ற இரவுக்கு துணையாக

எல்லாக் கண்ணீர்த்துளிகளும்
உப்புக்கரிக்கிறது
சிலவற்றில் மட்டுமே கவலை

உன்னை நோக்கி வீசப்படும்  வார்த்தைகள்
வீரியமற்று இடையிலேயேமரணித்துவிடும் 
 அதை அலட்சியப்படுத்தினால்

கோபத்தை குறைக்க ஏதேதோ சொல்கிறார்கள்
ஒரு சிறிய புன்னகைபோதுமென்பது தெரியாமல்

புல்லாங்குழலுக்குள் காற்றுமட்டும்தான்
ராகத்தை நீதான் தேடவேண்டும்

நான் வந்துவிட்டேனென்று
 மரணத்தைவிட அழுத்தமாய்
யாரால் சொல்லமுடியும்

சிறகுதான் முழைத்துவிட்டதே
எதற்கு இந்தக் காத்திருப்பு
பறக்கலாம் வா

ஸ் ரீபன்

இழப்பு

இரவுபெய்த மழை
ஈரமான வீதி
தாயின் கையை இறுகப்பிடித்தபடி
தெருவை வேடிக்கைபார்க்கும் சிறுமி
அவசரத்தில் எச்சமிட்டபடியே பறக்கும் பறவை
கடைசி நிமிடத்தில் கடந்துபோகும் பேருந்து
அலைபேசியின் திரையையே வெறித்தபடி மனிதர்கள்
எப்போவாவது கிடைக்கும் சன்னலோர இருக்கை
எல்லாமே தினமும் நிகழ்பவைதான் என்றாலும்
அந்த மஞ்சள் வீட்டு வராந்தாவில் தினமும்
கோப்பியும் பேப்பருமாய் இருக்கும்
வயதான பெரியவரை மட்டும்
இன்று காணவில்லை

ஸ் ரீபன்

9C OSLO official trailer Film BY ntpicture